【考試】2022攻讀指南

Q: 請問可唔可以出條updated嘅出題趨勢（P1AND P2!!）🙏🏻 想針對啲topic 溫書

---

話說我雖然喺YouTube 拍咗條片講吓個睇法到底係點，之但係有啲嘢寫出嚟好過剩係講，所以決定寫返技術文分析一吓有咩課題係熱門，甚至有啲咩內容應該必讀。事先聲明，我對自己貼題無咩信心，而且讀歷史好難剩係讀一部分而忽略另一部分。例如你唔知道《凡爾賽條約》嘅內容，好難知道希特拉點解會上台，乃至佢對外侵略列底係用緊邊啲藉口（而2012 年DSE 就已經問咗，當然你可以話年代久遠不值一提，但除非你諗住今年考完出年繼續，否則小心駛得萬年船呀各位）。而喺正式開始之前，我肯定自己會寫幾多篇講到有幾深入，更加唔知會唔會寫到中途半路就放棄，請各位唔好旨意哂我，亦都給予一定程度嘅鼓勵支持係無走歡迎的。

卷一資料題（DBQ）

試題分析

好，廢話小講，直接跳落正題。

首先係講咩課題會比較熱門。世界大戰同中國依啲必出唔使我多講啦？幾乎係年年 都出，不過小心係近年有跨課題跡象，例如2014 年以冷戰背景問國際協作、2019 年問中國華人同香港華人對於內地重大事件嘅睇法、2020 年取消咗嘅試題唔使我講你應該要知。咁所以世界無話必然，我夠以為公開試年年都有得考啦，邊個會估到最後備方案係同你講取消，自修生（即係我笑）咁點算呀？然後我哋睇返過往趨勢係每年有兩題係亞洲、兩條係歐洲史。

	世界大戰	​冷戰	​國際協作	​香港	​中國	​日本
2021	​和平十四點	​蘇聯外交政策		戰前經濟發展	改革開放
2020	趨和趨勢&衝突趨勢		​勢不可擋（經濟統合）	民主化及種族平等	中日關係（戰前）
2019	《凡爾賽條約》	低盪時期			中港關係	經濟復甦
2018	民族主義		​聯合國（社會協作）	​六七暴動	革命改革
2017	一戰影響		​戴高樂總統（經濟統合）	​前途問題	指導原則
2016	錯誤盤算	戈巴卓夫		社會文化	文革及改革開放
2015	​巴黎和會	​冷戰特徵			晚清	經濟復甦
2014	​綏靖政策		​教科文組織（社會協作）	​亞太地區	大躍進
2013	國際聯盟	​美蘇關係（1945-91）			民國	經濟復甦
2012	​極權主義		​​​戴卓爾夫人（經濟統合）		​文化大革命	政黨政治
樣本試卷	​綏靖政策	美蘇關係（1953-64）		​人口問題	民國
練習卷	集體安全體系	​美蘇關係（1950年代）			​文化大革命	​經濟復甦

透過上述個表我哋就會知道中國同世界大戰係年年都出，有時間各位可以望返教育局所設計嘅學習建議，佔得最多教學時數都係依兩個課題。不過算啦，近依兩三年嚟因各種原因而停課又轉Zoom，我諗無邊間學校邊幾個老師會按章辦事。何況我教日校的話，都係返工等放工，放工返歸湊仔（無意攻擊日校老師，只係道出一個自顧人仕同打工仔心態上嘅差別）。下一步我哋就要問仲有邊兩個課題大機會出，答案係日本同國際協作。

	國際協作	冷戰
2021		蘇聯外交政策
2020	勢不可擋（經濟統合）
2019		低盪時期
2018	聯合國（社會協作）
2017	戴高樂總統（經濟統合）
2016		戈巴卓夫
2015		冷戰特徵
2014	​教科文組織（社會協作）
2013		​美蘇關係（1945-91）
2012	​戴卓爾夫人（經濟統合）
樣本試卷		​美蘇關係（1953-64）
練習卷		​美蘇關係（1950年代）

我認為國際協作出資料題機會率比冷戰多係有兩個原因：

1. 三年約定 由於國際協作依個課題完完全全唔似讀緊歷史，於是唔少老師教起上嚟都唔知由邊個位入手，好些教教吓變到教通識咁。至於學生就避之則吉，大佬通識全球化單元仲睇唔夠多國際問題咩？結果造成唔少人忽略咗經濟統合同社會協作兩個部分，再望返趨勢表。原來每每出現經濟統合就會出社會協作（2012與2014、2017與2018、至於2020年出咗勢不可擂，咁接下落嚟嘅方向就呼之欲出），我唔敢話係個絕對必然發生嘅事，始終同你講肯定嘅就唔會係肯定，機會相當高就是啦。

2. 論述題考慮 依個位需要睇返論述題趨勢，假設有日我寫到卷二的話，就再同大家分享笑。

	香港	日本
2021	戰前經濟發展
2020	民主化及種族平等
2019		經濟復甦
2018	六七暴動
2017	​前途問題
2016	​社會文化
2015		經濟復甦
2014	​亞太地區
2013		經濟復甦
2012		政黨政治
​樣本試卷	人口問題
練習卷		​經濟復甦

至於我認為出日本機會率高過香港有三個原因：

1. 趨勢 車老師唔是黃大仙，亦都唔係耶穌先知，唔好同我講咩政治因素會唔會唔再出香港咁敏感，我唔知道、林鄭唔知道、你打62717171（國安熱線）都搵唔到任何訊息。講到明係分析，所以我哋相信嘅係理性思考。過去十年嚟每每考日本就無香港試題，問香港則無日本，你話有冇咁啱啦？而香港已經連續兩年出咗（2020及2021），雖然過去曾經試過三年都問香港題目（2016、2017及2018），但前題係日本喺2016 年前嘅四年試題佔咗三年（分別係2012、2013及2015）。不過今時今日唔同，兩個課題考核數字已經相近，分別係七題（香港）及五題（日本）。既然係咁，我相信考日本嘅機會率係大啲。

2. 課題內容 望返出過嘅題目裡面，香港課題大部分單元都問過咁，政治發展唔使講啦、社會文化、亞太角色，連經濟發展上年都問埋。相反，日本問嚟問去都係內在因素定外在因素對戰後經濟發展嚟講較為重要。除此之外，就只有2012 年問對軍國主義興起而言邊個角色較為重要（我知道軍國主義係論述題重點嚟，咁大佬呀，仲有個現代化程度呢？咸豐年前中學會考好鍾意問㗎喎），以無出過而又出得到嘅前題作為考慮，比我做考評局諗題目，我點都揀咗日本依個課題先啦。

3. 論述題分析 同樣係需要有卷二嘅些少理解，所以唔喺鼠班門弄虎啦，有緣就會喺不耐將來獲知㗎啦。

講到尾我認為2022DSE 四個課題分別係世界大戰、中國、日本同社會協作，要是中咗而你又剩係溫咗依四個課題恭喜你，但為免唔中嘅時候你飲恨自己唔保守啲溫多個課題，我都係嗰句。仔呀仔、女仔女，歷史科已經算係好少嘢要讀㗎啦，你可以有策略地溫，但唔能夠溫啲唔溫啲㗎。今時今日，小心啲沒差啦，何況讀書都唔單止係應付考試㗎嘛。