搞掂咗分數後，我哋就要分析考評局過往嘅出題趨勢係點樣。稍為有操過吓歷屆試題，或者有上網睇過吓啲前輩分享，再唔係你有專心聽我講書的話，都知道考核課題係有路可捉㗎嘛。先睇睇咁多年以嚟出過嘅課題：
| 世界大戰 | 冷戰 | 國際協作 | 香港 | 中國 | 日本 |
2021 | 和平十四點 | 蘇聯外交政策 | | 戰前經濟發展 | 改革開放 | |
2020 | 趨和趨勢&衝突趨勢 | | 勢不可擋（經濟統合） | 民主化及種族平等 | 中日關係（戰前） | |
2019 | 《凡爾賽條約》 | 低盪時期 | | | 中港關係 | 經濟復甦 |
2018 | 民族主義 | | 聯合國（社會協作） | 六七暴動 | 革命改革 | |
2017 | 一戰影響 | | 戴高樂總統（經濟統合） | 前途問題 | 指導原則 | |
2016 | 錯誤盤算 | 戈巴卓夫 | | 社會文化 | 文革及改革開放 | |
2015 | 巴黎和會 | 冷戰特徵 | | | 晚清 | 經濟復甦 |
2014 | 綏靖政策 | | 教科文組織（社會協作） | 亞太地區 | 大躍進 | |
2013 | 國際聯盟 | 美蘇關係（1945-91） | | | 民國 | 經濟復甦 |
2012 | 極權主義 | | 戴卓爾夫人（經濟統合） | | 文化大革命 | 政黨政治 |
樣本試卷 | 綏靖政策 | 美蘇關係（1953-64） | | 人口問題 | 民國 | |
練習卷 | 集體安全體系 | 美蘇關係（1950年代） | | | 文化大革命 | 經濟復甦 |
由於篇幅關係，所以無擺埋中學會考嘅試題趨勢落去，要是你誠心許願的話，相信有朝一日瞓醒起身就會收到㗎啦。
寫返正經嘢，據上述表格分析，我哋有好多嘢是睇到的，以下集中講兩樣。
1. 年年必出課題
唔知邊位心水清都知道啦，有兩個課題係年年出的，分別是世界大戰同中國。其實望返課程文件，教育局個建議教學時數依兩個課題都係最多，換言之，即係話重中之中。年年都有人問我可唔可以唔溫中國，係絕對唔可以。除非你唔想考個好成績，又，要是係咁嘅話，連本書都可以扔咗佢啦。
聽清楚，就算你係2020DSE，即係今年因為政治因素、疫情緣故，將資料題由過往四題全部必答，換轉係四題揀三題都好，中國同世界大戰依兩個課題你都唔能夠唔溫。望返前兩版，因為你是來補習，所以我目標係令到你至少拎到粒星走。即係話，用盡你九牛之虎之力也好，背到熟哂甚至希特拉侵略倒轉背到出嚟，咁先方向正確啊。
2. 出題模式
用傳統角度去講，正常每年份卷係要做四題，而依四題除咗有一條必然係中國同世界大戰以外，另外兩條絕對係一條嚟自主題乙，另一條係主題甲。咁所以策略上做得好，你係2020DSE，諗住試吓搏大霧看看自己夠唔夠運嘅話，係可以喺日本、香港、國際協作、冷戰四個課題裡面揀一個唔溫書。
不過夠薑你就試吓咁做，睇吓我點對你哼。