【考試】點樣整歷史筆記(1)?

《無底線你問我實答》

由於問題內容差唔多,所以我分為兩個主要問題去答 — 點樣寫History note & 點溫History好~


Q: 有冇咩溫習tips😂😂😂

Q: 可以講講你點寫history的note嗎?

Q: 中六嘅學生可以點溫好呢科🙊

A: 最近對寫筆記有啲心得,所以決定答咗依個問題先 — 先旨聲明,依個世界無一份筆記包你拎五星星,每份筆記原則上剩係適合筆記設計者所用,而以下只係集經驗而分享一個較為有效率嘅溫習筆記建議,未必啱全世界用(更加未必啱你用,舉個例我本身就好唔鍾意寫筆記)。之不過,假如你曾經有過「打開本書照抄啲內容落本簿到,突然抄抄吓有日醒覺同書無分別最後放棄咗」嘅經歷,你可以參考吓依個方法︰

首先,你要準備3本簿,依3本簿有唔同功用︰

1. 第一本係拎嚟寫內容,講到尾歷史科都係講緊歷史,你連冷戰係美國同蘇聯打,或者發生咗場戰爭叫韓戰(1950-1953)都唔知,咁就已經無得講落去,所以第一本筆記係要嚟寫內容。好多同學仔每個課題一本,結果N咁多本筆記,當你教科書都係得一本嘅時候,你啲筆記本仲多過教科書,咁你仲整本筆記出嚟為乜…記住,筆記嘅作用係寫低重中之中,唔係重點嘅嘢唔需要寫落去,所以一本寫內容就足夠矣。

話說話寫內容,但其實寫乜?估到你會咁問,歷史離不開都係事件同論點,上一次答過每個課題都有教育局要你學習嘅重點(「課程綱要」),唔知嘅話問吓Google或者碌返上一篇睇。咁你要做就係將學習重點入邊例子寫落筆記,記住例子唔需要由頭到尾寫一次原因、經濟同結果,例子作用係證明,所以你有年份、名同1-2句大約發生咩事就夠你答題目(記住係1-2兩句,唔係1-2段)。寫例子嘅時候好多同學仔都鍾意整條時間線(Timeline)由頭寫到尾,唔係唔得,但意義唔大;相反,將相近性質例子歸納埋一齊,咁樣嘅處理方法會較好 — 舉例德國入侵捷克(1939)、意大利入侵阿爾巴尼亞(1939)就可以擺埋入「極權主義侵略嘅例子」入邊。

寫內容第二部分就係要寫論點,基本上教科書有齊基本論點,但質素可圈可點,依到先建議同學仔博聞強記 — 唔好睇死一本書,所謂「一本通書讀到老」,望吓其他出版社,或者近年坊間都出版咗歷史科課文精讀書,都係個唔錯嘅選擇。然後將啲論點寫落筆記,基本上一個論點由例子、推論同解釋所組成,依個位就因人而已你選擇成段摘錄定點列式(Point-form)啦。

2. 第二本係叫技巧書,每次做練習或者上堂老師教或補習老師教,都唔多唔少講到啲題目嘅處理方法比你聽。依個時候最好整本技巧書,寫低咩情況下點樣處理,打個比喻2017DSEQ3 — 「試從資料指出第一次世界大戰女性地位轉變的誤解(Not exact wording)」,到底「誤解」點樣處理?學識果陣就寫返落本筆記,哪怕某日唔記得可以拎返出嚟睇,就好似個工具箱咁,哪怕唔知邊日要修理就可以拎出嚟修正。

至於技巧大致上可以為 — 資料題(DBQ)論述題(Essay)兩類題目嘅處理方法,你可以分拆成點樣睇資料、睇題目、組織論點、史實運用、提問語處理方法、提問範圍、提問字眼注意事項等等。

3. 第三本就係常犯錯誤,最近有個學生問我文科人同理科人有咩分別,問完我都要諗陣先答到(實際上到依刻都未問嘻嘻)。先唔講到人嘅分別,始終每個人本身就唔同,但文科同理科有個分顯嘅差距 — 理科有絕對答案,而文科無。舉例「1+1=2」,依個係絕對答案無人會質疑,你唔係答「2」就唔會拎到任何分數;相反,我問條Essay「試解釋第二次世界大戰爆發的原因」,就算相同分數都唔會答案入邊嘅每一隻字相同。

換言之帶出嘅道理係「你就係你本身最好嘅導師」,就算補習講N個常犯錯誤都係成班學生嘅集體錯誤(Common mistake),你未必會犯依個錯。到底你自己嘅答案差啲乜,到底你點樣先可以進步,唔需要人哋話比你聽。睇返自己做過嘅練習,自己講返比自己聽,細心分析改善,漸漸地你就會有躍進(直入式賣吓廣告,當然補習有人督促住你會事半功倍啦,但其實夠自律真係唔需要…)。

情況大約係咁啦,歷史科唔使多,三本筆記就足夠,甚至依三本筆記對你自己而言更彌足珍貴!

答完第一個問題發現已經千幾字出哂事,溫習建議我決定留返聽日再講,有興趣記住留意啦。或者有任何關於History嘅問題,記住記住用Q&A session發問啦,識答一定答。