Q: 點溫ww1
．
A: 處理依個問題之前，首先要知道第一次世界大戰（WW1）並唔係一個獨立課題，佢係連住第二次世界大戰（WW2）嘅。換言之用最簡單嘅方法理解，第一次世界大戰（WW1）佔你6個課題入邊嘅0.5（即係10%都無，事實上係更小）。所以投資溫習時間同內容方面要做返適當嘅取捨啦～
．
上邊講嘅嘢並唔係吹水，以DBQ為例，望返PP都係得一條2016年獨立出哂一戰，其他就好似2017年咁問一戰影響連住二戰咁出，溫果陣可以注意返歷史嘅連貫性，咁就容易上手之餘更事半功倍啦！
．
有基本認識之後，講返重點，第一次世界大戰主要學3樣嘢︰
1. 1914年前列強之間嘅關係
2. 導致一戰爆發嘅原因
3. 一戰之前列強維持和平嘅方法同成效
．
【列強關係】即係講緊歐洲各個國家之間嘅關係點，就好似英德關係惡劣、德奧關係緊密友好等、有啲咩原因導致依個關係出現、有冇相關例子證明。以Essay而言，依個部分主要出啲評論嘅題目，舉例有啲咩原因影響德法20世紀上半葉嘅關係咁樣；
【爆發原因】就係講緊有咩原因導致第一次世界大戰（或者教育局嘅講法就包埋戰前嘅衝突），Essay大路會問啲需要駁論嘅題目，就好似民族主義在什麼程度上導致第一次世界大戰爆發、或者2016DBQQ4錯誤盤算係咪導致一戰爆發嘅主因啦；
【維持和平嘅方法同成效】講緊列強喺一戰前為維持和平（或者解決衝突、改善國際氣氛）做咗啲咩，Essay會問個方法係點、成效大定小、或者拎埋二戰前嘅方法嚟比較等等。
．
雖然一開始講一戰依個課題佔成個歷史科內容10%個都無，但其實要學嘅嘢都唔少，甚至影響之後二戰或冷戰嘅發展，所以同學仔唔好諗住棄咗佢呀～若果想了解更多關於一戰，其實由德國統一（1870）開始讀起會更加好，不過答題目果陣就要小心啲以防Out Syl啦。
．