Q: Essay 點樣寫反駁？
．
A: 同學仔，學寫反駁前首先要搞清楚咩嘢係「反駁」 — 咁就要回顧吓你點樣寫Essay，首先收到條題目，之後開始諗Point，再諗例子（Evidence）去論證個Point成立，依個過程叫立論。所謂立論就係建立啲觀點去支持你嘅立場，舉例你同意巴黎和會安排失當係導致二戰，咁你就會諗論點（德國不滿、意大利不滿、民族自決問題等）論證立場。換言之，反駁原則上剩係會喺啲要比立場嘅題目出現，此為重點一。
．
上邊個問題未答完，反駁就係當你建立完自己個觀點後，再舉多個觀點出嚟（要論證其成立），然後用原先個觀點去駁斥。就咁睇字或者好複雜，試吓列點先。
．
示範題目︰巴黎和會安排失當在什麼程度導致二戰爆發？
1. 建立自己觀點（論證巴黎和會點樣導致二戰）
2. 建立新觀點（論證其他因素E.g. 經濟大衰退、極權主義等點樣導致二戰）
3. 駁斥（帶出巴黎和會比其他因素E.g.經濟大衰退、極權主義等因素更具重要性）
由此可見，所謂「反駁」係衡量緊兩個因素嘅重要性，此為重點二。
．
入正題前講多兩句，咁係咪有立場嘅題目就要寫反駁？以蔣介石係咪一個好人為例，同意嘅話就寫一堆論點去證明佢係好人；反對亦都係寫堆論點去證明佢係壞人。咁樣睇已經回應咗立場，咁仲需唔需要反駁呢？假如你係個爆發型嘅學生（即係45分鐘可以寫到1500字以上，或者5個論點以上），建議你寫埋；反之，處理好立論先啦。咁樣睇嚟，有立場嘅題目唔一定要寫反駁，此為重點三。
．
搞清咗「反駁」嘅概念之後，喺時候答返問題，到底點樣寫反駁好？同學仔應該問緊第3點（即係衡量兩個觀點嘅重要性）點樣寫先有說服力，或者不至於係到自說自話 — 即係不停話你好佢唔好，但就無解釋到點解你係比佢好。咁呢，其實都係搵比較點嘅問題，一般講緊個對個問題嘅直接或間接，以極權主義同經濟大衰退為例，極權主義國家發動侵略直接導致二戰；相反，經濟大衰退直接影響係經濟衰退，間接影響先導致二戰。咁自然高下立見，極權主義喺導致二戰依件事上比經濟大衰退更為重要。
．
一段有理據嘅反駁係拎高分嘅關鍵（坊間有唔少同學仔都做得麻麻），所以依要加把勁呀！
．
關於History有咩問題歡迎喺Q&A session問，識答一定答～