Q: Trade and explain嘅essay question要點答先高分？
．
A: 正式答問題之前有樣嘢不得不講，同學仔睇嚟你要學好啲英文啦。「Trace」解追溯；「Trade」呢就解貿易。咁歷史科會考果隻題型叫追溯並解釋（Trace and explain），貿易與解釋（Trade and explain）就暫時都未見過，留意返啦～
．
一般嚟講，追溯並解釋題型考核一段長時間嘅歷史發展，即係無廿年都有十年果隻。題目會有個特定對象，要求你喺依段歷史長河入邊分階段咁描述特徵同解釋轉變原因。
．
明白就跳入教學部分。
．
生活化例子︰追溯並解釋過去年20年你同A小姐嘅關係。
．
拆解吓依條題目先，20年明顯係長時間啦，要求就住「你同A小姐嘅關係」討論，即係有特定對象。更加重要係有「追溯並解釋」五隻大字，掂。
．
處理方面，你同A小姐嘅關係無可能一成不變，相反，所謂「女人心海底針」，關係應該係變幻無窮嚇你一跳。亦因如此，正式作答前就要為依20年嘅愛情長跑劃分階段。咁，乜嘢係分階段呢？即係將20年斬細佢，變成唔同時期，而時期同時期之間存有顯著性分別，就好似以下示範啦。
．
第一階段（第1-3年）︰甜蜜期
第二階段（第3-5年）︰緊張期
第三階段（第5-12年）︰穩定期
第四階段（第12-17年）︰親密期
第五階段（第17-20年）︰廝守期
．
好啦，知你會問點樣劃分出嚟架，依家解釋比你聽 — 第1-3年基於初初拍拖情到濃時關係自然甜蜜；第3-5年開始出現分歧、嘈交同磨合，關係變得緊張；第5-12年明白同對方相處嘅方法，得心應手關係穩定；第12-17年談婚論嫁關係親密；第17-20年下輩子都屬於A小姐，關係進入斯守。
．
咁即係點樣劃分？打咗一大段嘢仲問！以A小姐關係為例，當特徵出現轉變，同上個時期有出入果陣，就係階段嘅劃分點啦。情況就好似第5-12年關係穩定同第12-17年去到談婚論嫁嘅階段，一個仲係情侶關係，另一個已經係做人妻啦。
．
（其實諗深一層，你自己嘅人生正好係條追溯並解釋，痴咗線，寫Essay悟透人生）
．
拿拿聲講埋點處理就收工。每個階段都要追溯同解釋，追溯嘅意思就係講故仔，講返果個階段嘅特徵；至於解釋就係分析階段出現嘅原因，詳情可以參考下列示範。
．
【追溯】第一階段（第1-3年）︰甜蜜期
你每晚都會同A小姐傾1粒鐘電話；
你每個星期日都會同A小姐行山；
你每個月都會送份禮物比A小姐；
（應該無人想知啦）。
．
【解釋】第一階段（第1-3年）︰甜蜜期
你同A小姐都係初戀，好愛對方；
拍拖對你嚟講好新鮮。
．
換言之，追溯段落係要拎啲史實出嚟證明階段特徵（關係甜蜜），解釋段則要拎啲原因嚟論證階段出現。即係話每當你劃分一個階段就意味住你要寫多兩段，咁到底要寫幾多個階段呢？因人而異，但一般都係3至5段左右。
．
明白上述原理，同學仔可以參考以下Pastpapaer示範（印象中之前有條問題係話可唔可以提供Pastpaper答案果類，嗱咪話唔醒你，機會嚟啦，飛雲！）︰
．
2016DSEQ5示範題目．追溯並解釋1943-1991年間美國與蘇聯的關係︰http://chesterhistory.blogspot.hk/2017/03/blog-post.html
．
追溯並解釋拎嚟溫書其實一流，同學仔不妨考慮吓 😀
．
關於History有咩問題歡迎喺 Q&A session 問，識答一定答～