Q: History要幾多成先有level 5？ Thanks for answering 🙈❤
・
A: 依個係唔少同學仔都會關心嘅問題，先講論述題（Essay），卷二拎層級C，即係17－19分；而資料題（DBQ）拎48－52分就好穩陣會有Level5。不過投資涉及風險，分數可升可跌，當份卷難果陣自然分數會低啲，易果陣會高啲，依類廢話點都要講幾次。
・
諗好目標後，不如講吓點樣達到？
・
當你操夠一定歷屆試題（Pastpaper）後原則上資料題個分會穩定落嚟，大約係45－55分依個範圍，要突破就因人而且，有人係粗心大意要小心啲、有人係提問語搞唔掂要溫返答題技巧、有人係拆解線索問題要睇多啲資料、有人係解釋表達問題要寫多啲論述題。所以你要達到Level5依個目標第一件事係做哂歷屆試題，而下一步點玩就睇你自己。
・
至於論述題呢？一般嚟講你正正常常個分都唔差，問題係，乜嘢先叫「正正常常」？首先搞清楚答題技巧 － 駁論、比較定乜都唔使；然後答啱問題 － 問你鍾意食你要答食物，而唔係話你今朝返學搭巴士。咁樣，你個分會唔錯，保守啲估計會有15分或以上。要再升再突破就睇情況，有係寫唔切論點討論唔夠深入、有人係比較或駁論能力弱無咩說服力、有人係太過吹水無咩史實。換言之，論述題首要搞清楚係點答同寫咩*先。
・
追趕目標係條唔易走嘅路，途中會有驚喜會受傷，或會迷惘或者失落，但點都好，相信咬緊牙關撐到最尾，風景一定好靚。
・
〖注意事項〗
所謂「操夠」唔係講做完就算，而係做完自己改一次，再比個你信任嘅人改一次，然後對照返自己評改嘅落差，再針對失分位檢討改正；
關於「點答」同「寫咩」具體啲咁講就係題型同內容。