【考試】考試原則-時間運用


 

依單嘢都係呀叔以前去補習學返嚟,背後有好多理論,首先我哋睇吓考卷嘅考生須知先。

  1. 本卷為歷史資料題,全部試題均須作答。每題佔分於題末括號內顯示,用以提示作答所需之篇幅;答案長度可為一小段或若干小段。

  2. 倘若試題設有分題,考生必須相應分部作答,否則可能被扣分。

  3. 答案須寫在答題簿內,每題(非指分題)必須另起新頁作答。

  4. 每題於題首處標示該題所涵蓋的課題。

依個章節集中睇第一點,所有題目都要作答之外,每條題目嘅分數意思係提示作答所需之篇幅。好啦,學校老師實教你兩分一個論點,咁所以四分題目就要寫四個論點,是唔是?概念上係啱,亦都係考評局嘅講法。之但係,我哋係考試研究者,咁所以我哋唔用一般坊間大眾眼光去睇依句說話。


先諗吓你去考試有唔同背景嘅人去考,有英中、有中中、有自修生、有日校老師、有補習老師、有大學生,咩人都有。我問你,你寫一個論點定係我寫一個論點快啲?既然係咁,考試係唔公平,是唔是?係,你用兩分一個論點角度去睇就係,因為有些人操練比你多,資歷比你多,例如好似我咁寫個論點實快過你,換言之,係比你理應用更少時間就完成咗份卷。


不過考評局會話你知考試制度係公平的。因為分數提示唔係講緊論點數目,反而係你嘅作答時間。我想問,依個世界有冇人係一日有廿五個鐘?無呀嘛,既然是咁的話,每個人入考場一刻所擁有嘅作答時間都係一致。如此睇嚟,我就結論出一條公式:


總考試時間(120)➗總分數(60)=每條題目理應運用時間(2)


亦即係每個補習老師都宣傳嘅口號,兩分鐘答一分嘅題目


再講多幾句廢話,雖然你哋相對少經驗喺學校考試,都唔知係好事定係壞事嚟。但我可以同你講考歷史最常見兩類學生,一係早就本著放棄狀態,大約開考半粒鐘至一粒鐘之後就停哂手,去吓廁所、瞓陣覺、畫吓公仔等收卷過日神。另一類就係寫到張枱震哂,喺佢前前後後嘅考生就麻煩啦,都唔知條友嚟緊考試定係做裝修,極大動作勁滋擾。最頂癮係佢哋考完試通常都係講句,頂岩岩寫漏咗個論點,差一條分題唔夠時間做呀救命。


我用過來人身份同你哋分享,上述兩種考試狀態都唔係一個好嘅表現。考評局唔係傻㗎嘛,好人好者做咩要整份卷係考兩粒鐘,而唔係考四粒鐘、六粒鐘、八粒鐘?就因為佢哋認為一個有手有腳有溫書有腦袋嘅人,係能夠用兩粒鐘就做哂份卷。你開考唔夠半粒鐘就做完,即係代表咩?講緊你有好多內容散略咗,答案完完全全唔完整,麻煩返去溫吓書出年再嚟過啦。你考試結束都未做得哂所有題目,咁又反映緊啲咩?話緊你好似我依家咁,寫咗極多廢話都唔中論點,難比分你啊哥仔。


最理想嘅作答時間,就係考官宣布考試結束嗰陣,你就啱啱好寫完最後一句,咁就完美啦。問題係,點樣去控制點樣去拿捏?


一來係經驗訓練,大哥你依家得個諗法,唔操練就紙上談兵。現場環境變化咁大,你遇到條熟手嘅題目,跟你遇到條六神無主嘅題目,係可以兩個唔同嘅表現嚟;


二來係電子錶,由於我們係一個個人,人就是有缺陷,仲要係好多好多好多嘅缺點。所以我哋唔相信自己,唔相信有能力克服唔識得答嘅題目。反而,我哋將一切交比時間。無論我答得幾順,定係答得幾濕滯,我都會喺指定時間內完成,一夠鐘就彈去下一條。


記住,一時嘅光輝未必係永恆,就算你肯定自己嗰條題目拎硬滿分也好,夠鐘就要鬆手落去條新嘅題目。最簡單嘅道理,就是你歷史5**也罷,中英數通識是但一科唔夠3322,都係入唔到大學。考試制度,正正就係要訓練我哋成為一個聽教聽話嘅乖仔乖女啊。