【考試】有冇Essay 技巧?


Q: 香港到底要點温?

Q: 唔該我想問下呢寫essay有咩技巧,我用英文讀,寫左好多史實,分左aspects寫,篇幅都唔算短,但係成日都係及格多少少。求指教點樣寫得好啲同高分啲。

A: 【香港問題】之前好概略咁講過香港史可以點讀,詳情可以睇返之前嘅帖(http://chesterhistory.blogspot.hk/2017/11/blog-post_1.html)。發現自己睇完都唔係好明嘅話,就諗清楚自己邊個位唔掂,然後再問(記住具體啲)。始終,單一句「香港到底要點溫」空泛到上至天文下至地理都關事,唔知你想要咩答案。

【Essay技巧】早前講過吓「拆字」,喺到嘗試講得詳盡啲。唔使諗到咁複雜,Essay技巧其實得三種,分別係評論、駁論同比較。一寫Essay本身就屬於觀點評論,所以無咩好講。駁論呢,之前講過,詳情可以睇返之前嘅帖(http://chesterhistory.blogspot.hk/2017/10/blog-post_20.html)。

比較反而未講過。原則上,需要比較嘅題目係「ABC」嚟。乜嘢係「ABC」?所謂「A」,即係比較對象A;「B」則比較對象B;而「C」就係比較項目。

講得比較一定係兩舊嘢做比較,情況就好似iPhone定Note7好用啲,你係就「iPhone」同「Note7」去比較,一係「iPhone」;二係「Note7」,一加一等於二,係兩舊嘢嚟。過去有啲同學鍾意鑽牛角尖,話同自己比較,自己得一個咪一舊嘢囉。係,但係你點樣同自己比較?你會拎「依家嘅自己」同「過去嘅自己」做比較,咁依家嘅自己(一)同「過去嘅自己」(二),一加一等於二。不要再說了。

至於「C」好快就講完,做比較你都要搵樣嘢比較,比較「iPhone」同「Note7」可以有千百萬樣嘢比 — 價格、市場佔有率、款色、功能、重量等。依家到底係比較緊咩先?換言之,一條比較題得「A」同「B」係未成立,要有埋「C」先算係一家人。

示範題目(2017DSEQ2)︰試以課程內一個改革和一個革命為例,比較改革與革命作為推動20世紀中國蛻變的方法。

A: 改革

B: 革命

C: 推動20世紀中國蛻變

一般嚟講,大部分比較題都會搵到「ABC」,小部分題目無咁明顯要轉個彎先諗到。同學仔咁好彩遇到依類題目嘅話,比四個字你 — 見招拆招。人是生題目是死的,腦筋急轉彎,相信你無問題的 😀

睇到依到好遺憾咁講句,同學仔你應該唔係答題技巧上嘅問題。相反,你係唔知條題目問緊咩。舉個例,今日個晏你食咗啲咩?

好啦,因為依排窮所以去CC Can食頹飯(四餸有汁12蚊真係好抵)。無論你係食學校小食部、大快樂、呀媽煮、餅乾、合味道都好,你嘅答案都係圍繞住「食物」。你唔會答「今朝返學搭MTR」架嘛,家陣寫潮文「我話唔要嘢飲,佢話我係咪睇電視」,玩嘢咩。

換言之,當條題目問「試解釋歐洲列強於二十世紀初爆發衝突的原因」嘅時候,你係答緊「原因」,而唔係衝突嘅經過、衝突嘅影響等等。依點好重要,但往往好多人忽視。依家唔係初中歷史(雖然無讀過),唔係背書遊戲,史實嘅意義係支持你嘅論點,證明你唔係吹水得個講字。所以史實足夠就可以,多唔代表你威,相反,你用咗好多史實但都解釋唔到論點,咁就得不償失啦。

好多同學仔好怕寫Essay,但其實寫Essay唔單止練到你個腦嘅思維能力,仲磨緊你支筆。點樣一針見血?點樣到Point?點樣扣題?點樣表達?點樣解釋?唔寫,又點樣同你講喎。嗱,Touch-wood咁講句,假設仲係無進步嘅。唔緊要,寫條Essay嚟望吓啦。寫Essay啫,無話解決唔到嘅,大家一齊拆掂佢,好無?

關於History有任何嘢想做歡迎喺 Sayat.me/chehistory 提出,識答一定答。