小插曲(3)

話說有日車老師起身準備返旺角上堂，殊不知收到個學生WhatsApp 話佢唔記得咗帶筆記，但已經出咗門口，而屋企同補習社距離都唔近，問我無帶筆記嚴唔嚴重？由於我哋一份筆記係用四堂，雖然係每堂會派額外練習協助教學，但主要教學內容都係喺筆記裡面。既然係咁，話無筆記上堂唔嚴重我都係呃緊個學生。

於是好果斷咁答「嚴重啊. . . ！」

然後佢問我可唔可以Send softcopy note 比佢. . . 依個問題又考起咗我，就現實層面各位都知道我係用iPad 上堂，換言之，我一定係有softcopy note，問題係我肯唔肯分享。比著係幾年前嘅我，我會毫不猶豫咁將個檔案交比個學生。然而，今天我卻步了。大約係三年前我將每堂會用到嘅筆記softcopy 放喺whatsapp group，方便啲無嚟到上堂，又或者想重溫嘅學生。以上，我都係用學生角度去諗點樣可以幫得到手。然而喺考完DSE 以後，可怕嘅事就發生了。有學生同我講喺carousell 賣我嘅筆記，初時都不以為然，始終各位嚟上堂學費係包埋筆記，考完試點樣處理都係各位嘅事。但望真啲唔係喎. . . 頂softcopy 嚟嘅. . . 吓. . . 唔係真事呀嘛？

時至今日我仲喺Carousell 見到，問你死未. . .

從此我就怕怕，唔敢再send 任何筆記比學生，可以話我係斬腳趾避沙蟲，但都可以講我係唔想再經歷一次信任遊戲了. . .

返去本身講緊嘅話題，於是我就同個學生講「我影比你啦」，意思係揞荷包去影印鋪重新印過本筆記(各位手上嗰份筆記雖然唔係彩印，但唔好睇少熱熔個價錢都唔平㗎). . . 始終我覺得有張紙寫對住寫，同齋聽個感覺差好遠。然而，之後嘅事就唔好再提。

跳到去結論係，就算依家只係上咗3 堂，未知各位對車老師有咩感覺。只能夠講，無論過去定現在，我都係以你哋嘅利益為依歸。好多時，就算要我蝕底少少，但換嚟係你哋學歷史嘅過程更加舒服、更加開心，我係唔介意犧牲。唔需要覺得我偉大，我亦唔係想要你哋咩回報。

一切只因你哋係我學生，我都係做返我應該要做嘅事啫，親。