2026 free lesson(2)

我都唔記得自己幾耐無搞過免費試堂free lesson 了，最深刻係初初出嚟全職做補習，大概係2018DSE 考完嘅暑假。當時唔知點樣搵學生，就如2021DSEQ4 咁，要令到蘇聯可以賣可樂，最好嘅方法就係等總理(赫魯曉夫)試吓。諗返當時都幾癲㗎，因為無自己嘅課堂，所以周圍去唔同嘅starbucks 試堂，啲時間都好奇怪，誇張起嚟0900 去沙田一個我從來都無去過嘅地方(到依家都唔知係邊到，亦都唔記得咗了)。本著一個有學生試起碼有機會，坐喺到咩都唔郁個天唔會跌個學生比我嘅心態，一個暑假咁就過去了。咁樣搞法係有收到學生，亦都有好多學生試完就無咗件事。

依家諗返轉頭都幾傻、幾白痴、幾熱血，但Chester 就係個咁嘅人，笑。

咁樣數手指法，事隔7 年，考完個2025DSE 見自己都做咗個答法。與其喺threads 都唔知有冇睇，不如試吓搞返free lesson 睇吓會唔會收到學生(另一方面係我見到有唔少行家都係咁做，算係有樣學樣吧)？結果係. . . 同7 年前分別唔太大，最後有8 個學生報名，嚟嘅係4 個(仲要有兩個係我學生)，1 個學生話病咗但照上Zoom。換言之，樂觀咁睇都係得3 個學生放飛機啫，唔係幾差，出席率計返都有50% 以上. . . 笑

我有冇話好唔開心好灰心？話無就肯定係呃人，多或少點都有啲啦。始終我以為自己喺依行打滾多咗啲時間，點都會有學生認識自己，點都會有啲號召力。未去到一呼百應，都起碼有啲支持者。殊不知我還是那個我，俊？邊到俊啊？無人識你呀. . .

事情就係咁樣過去，我寫返出嚟嘅目的係希望賦予佢一個新嘅意義。唔好以為自己好勁好厲害，唔好以為自己好把炮，麻煩真係要保持謙遜，距離我想到達嘅嘅終點還有好多嘅路，還差得遠呢親

講起我真係要更加努力先得啦🥹