國殤虞美人花 – 戰爭的紀念
- chehistory
- 11月8日
- 讀畢需時 4 分鐘
作者：Jeff
日期：2025年11月8日
世界各地有好多紀念戰爭嘅文物、博物館、建築、甚至節日。其中一個標誌喺每年嘅國殤紀念日都會喺全世界出現，佢就係「國殤虞美人花」，英文稱 Remembrance Poppy（佢個名好長，呢篇文我姑且叫佢朵花本名罌粟花算了）。喺香港，呢個標誌雖然存在，可能11月11號會見到新聞皇后像廣場有悼念，但除此之外，我哋都好少見到佢。見就快到11月11日，今日就喺呢度講下佢嘅歷史，我哋可以用咩眼光去睇呢個紀念戰爭嘅象徵，同埋佢喺香港標誌住啲咩吧。
我去澳洲嘅時候去咗佢哋首都坎培拉嘅戰爭紀念館，買咗一本叫 The Book of the Poppy 嘅書，想了解多啲罌粟花嘅象徵，果然佢講咗呢朵花嘅出處。喺1915年，一個叫 John MaCrae 嘅前線護士喺安葬佢戰死沙場嘅朋友嗰陣，發現墓地嗰度（Flanders Field）生咗好多罌粟花，場面極為淒美，加上佢本身都係一個幾有詩意嘅人（本書咁講sls）佢寫咗一首名留青史嘅詩出嚟。英文唔錯嘅朋友可以讀吓，原文如下：
In Flanders Fields
In Flanders fields, the poppies blow
Between the crosses, row on row,
That mark our place; and in the sky
The larks, still bravely singing, fly
Scarce heard amid the guns below.
We are the Dead. Short days ago
We lived, felt dawn, saw sunset glow,
Loved and were loved, and now we lie,
In Flanders fields.
Take up our quarrel with the foe:
To you from failing hands we throw
The torch; be yours to hold it high.
If ye break faith with us who die
We shall not sleep, though poppies grow
In Flanders fields.
John McCrae
後世多數對呢首詩評價不錯，雖然有人視佢為一首鼓吹戰爭嘅詩，大多數人認為佢好成功寫出咗戰爭嘅殘酷、悲慘、現實、同埋無謂。更重要嘅係，佢將罌粟花嘅意境同戰爭嘅淒慘寫埋咗一齊，又用一個好易明嘅方式表達咗出嚟。此後，呢首詩喺民間廣泛流傳，仲翻譯咗做好多語言，喺唔少當代戰後（戰爭中）嘅人留咗好深印象。同時，有好多民間組織自發大量生產罌粟花（唔係種，係膠製，到依家都係製造緊同一種花用嚟做紀念，參見圖一）用嚟宣傳呢個紀念戰爭嘅標誌。慢慢，呢朵紅色嘅小花就變咗大部份西方國家用嚟悼念烈士嘅符號。
然而，我哋喺香港好少見到呢個標誌。自1919年起，港英政府每年都會紀念一戰結束，而皇后像廣場嘅和平紀念碑就喺1923年起好。此後，香港人每年11月都可以喺嗰度見到罌粟花嘅蹤影。即使係咁，我哋嘅日常生活同戰爭都好抽離。容許我做一個好reductive 嘅評論：香港人同戰爭抽離甚遠，甚至對呢樣嘢冇概念。我哋始終唔再係經歷日子時期嘅一代人，即使係阿婆阿公講故事，去到最後都只係聽，冇真實經歷過。而當我哋身邊又冇一啲常見嘅紀念活動（最多一年一次），我哋對戰爭嘅構想更加缺乏。
相比其他國家或者地方，好多地方都好注重自己嘅歷史（喺紀念戰爭方面）。以廣島為例，即使佢哋對戰爭嘅睇法備受爭議（軍國主義復興/否認二戰責任），佢成個城市中心最標誌性嘅一棟建築正正係用嚟紀念戰爭，甚至變咗當地嘅標誌，單單呢個行為已經睇到佢哋對歷史嘅重視。
我自己都係當時去到澳洲嘅戰爭紀念館先明白罌粟花嘅意義。呢個猶如聖殿般建築方法嘅地方特別用嚟紀念當時戰死嘅烈士，兩邊牆上除咗寫晒佢哋每一個人嘅名，仲塞滿晒罌粟花（膠製嗰啲），一朵花就代表一條人命。我哋記開嘅數字：蘇聯二戰死咗2700萬人、美軍喺越南每過星期喪失300軍人、凡爾登戰役有100萬死傷等等，其實呢啲數字帶住嘅重量我哋永遠唔會明白。呢種紀念軍人嘅方法除咗好有symbolic power 之外，亦係一個好有效令人實際見到（一朵朵花喺正你面前，參見圖四）戰爭從來唔係數字，而係一條條人命嘅損失。
喺香港呢個公眾歷史咁缺乏嘅環境，我哋有時不妨都可以諗下歷史俾我哋嘅教訓。正如The Book of the Poppy 嘅作者咁講，呢朵國殤虞美人花蘊含嘅力量就係在於我哋見到佢嘅時候會諗起戰爭，會諗起歷史同埋過去。其實香港（同埋世界各地每一個地方）都有好多具有歷史性嘅標誌同埋事物我哋日日都會見到。DSE 嘅歷史科雖則喺我眼中係一個不尊重學術歷史嘅考試，係一個將一個廣泛嘅人文學科塞入考試制度裏面嘅嘗試，但我哋既然都通過呢個考試接觸到歷史，都無妨俾自己一個認識學習一下歷史教過我哋啲乜，望吓自己周圍嘅歷史，從中明白歷史往往多於年份、日子、同埋數據。
留言