Q︰有咩忠告俾中四學history ge 學生？？ 😉
Q︰如何高中學好歷史 😭
．
A: 關於中四修歷史嘅同學仔，唔理你當初選擇讀依科嘅原因係咩都好，嚟緊三年你都要讀依科就係鐵一般嘅事實（除非你真係讀得好唔開心，所以退修依科啦）。既然係咁，賊船唔上都上咗，諗吓點樣讀好佢或者讀得開心啲啦。
．
其實歷史依科幫助緊我哋去理解緊依個世界 — 夏天個個都開冷氣，但係點解有冷氣？赤柱點解叫赤柱？但赤柱英文叫「Stanley」而唔係平時廣東話譯音，點解嘅？成世人流流長長，吃喝玩樂瞓之餘多啲問吓點解咁、點解又係咁、點解唔可以咁？知道增長外更明白理解多，而唔係照單全收、本來就係咁架啦～而，歷史就係通往世界嘅其中一道門。
．
既然係咁，趁中四仲有時間就讀多啲書，所謂「讀書能醫百病」，最好搵到兩三個志同道合嘅朋友仔搞個讀書會，一齊討論吓書入邊嘅問題或者情節，滿足吓知性欲望；讀萬卷之餘更應行萬里路，歌都有唱「咁好天去吓海邊」，親身感受吓依個世界，即使係香港都有好多報紙或者雜誌啲鱔稿介紹以外嘅隱世超邪惡景點呢～
．
講返重點點樣學好高中歷史，首先歷史發展同史實係重要，你唔知一戰前發生咩事已經無得講落去，所以溫書果陣「睇」一次課文內容。至於乜嘢係重點邊乜嘢係廢話，其實自己可以上教育局歷史科有「課程綱要」詳細列哂 — 舉例「第一次世界大戰」就要學3 樣嘢（二十世紀初列強關係、競爭與衝突嘅原因、維持和平的努力）。或者自己懶嘅，坊間都有唔少精讀雞精，自行考慮邊本適合自己。
．
睇完之後，你大致上有個概念個課題發生咩事，每一點嘅基本例子同論點，非常好，咁你就學識咗「拆題」啦。所謂「拆題」就即係收到題目之後，配對返題目問緊咩課題內容，然後唔使多講。唔少同學仔都會出現離題、答案九唔搭八等問題，依個時候善用「拆題」依招真係救你一命。
．
諗諗吓同學條你條題目都問得幾闊，寫多九萬幾千字都必答得哂，再加上我懶啦。依兩條問題答住咁多先，有咩唔明白、好書介紹、好景點推薦、唔識答題目等等等，就繼續問啦，識答就一定答。
．