【個案剖析 ─ 誰的冷戰】
冷戰到底係資本共產還是美蘇之爭？依個問題其實問緊每個國家喺冷戰嘅參與度。打個比喻，讀緊中學嘅大家當然玩過時事問答比賽，班班都要派個代表出嚟喺台上一爭高下。咁，問題嚟啦，時事問答比賽到底係班際競爭還是同學互鬥？
．
嘻，開放式問題本身無絕對答案，換言之，你話係班際比賽又得，話係個人競爭亦得，得咗。頂，玩嘢咩？誠如IG Story 所講，揀立場就同諗食晏去邊好一樣，好味當然開心啦，難食嘅 ... 咪硬著頭皮下次唔去食囉 TuT
．
不過，班際比賽同個人互鬥有啲咩論據？時事問答比賽當然係班際比賽啦，喺準備過程全班同心協力，齊上齊落咁整個Question bank 出嚟練習，班上每個人都參與其中，唔係班際仲可以係咩(?)然而，換個角度咁睇，實際上時事問答比賽剩係得台上嘅同學仔有權作答，代表們嘅表現往住有決定性作用，誰勝誰敗，就睇佢哋嘅造化啦。
．
咁，冷戰呢？
・
冷戰你可以話係資本共產之爭，舉例經濟方面，無疑東西歐喺冷戰期間互相抗衡 ─ 西歐方面，既有歐洲煤礦共同體（1952）、又有歐洲共同體（1967）；東歐方面，雖然剩係得經濟互相委員會（1949），但成員國簽訂多項貿易協定。兩大陣營互相敵視，不容退讓，唔係資本共產鬥仲係咩(?)然而，同樣係倒轉槍頭睇，兩大陣營經濟對立嘅局面係邊個造成？美蘇。正因美國喺1947 年討論馬歇爾計劃，而蘇聯喺1947 年推行莫洛托夫計劃，雙方不斷競爭擴張影響力，結果先造就東西兩歐（或者籠統咁講即係共產義本）嘅對立出現。
・
嘿嘿，西瓜靠大邊，揀邊個立場易寫啲自然高下立見。
・
處理依條題目果陣要小心啲，思考期間難免聯想到冷戰主要由意識形態所導致，換言之，當然係兩大陣營嘅對抗啦。之但係，意識形態差異同美蘇或者資本共產有冇明顥關係先？無。咁，要轉一轉思緒，諗吓美蘇角色同其他國家嘅參與啦～