緊張(1)

寫依篇之時，2025DSE 已經考完，2026DSE 都上咗第一堂。數吓手指2015DSE 係我執教嘅第一年，換言之，2026DSE 已經係我第十一屆學生。我唔知可唔可以咁計，因為中間2016 及2017 依兩年我無點收過學生，個人都渾渾噩噩過日子。啱啱Check 返打二戰而停辦咗兩屆奧運會(第12及第13屆)，奧委會都無停止計落去，1948 年倫敦奧運係第13 屆。咁所以我話2026DSE 係我第十一屆學生都唔過份。唔知點解國際社會咁計，可能歲月不饒人吧？就算無搞奧運，時間過咗去就返唔到轉頭，大概是這樣吧。

有啲人話教書教得耐係會習慣，甚至係失去教育熱誠。就似啲人做邊行會唔想收工接觸返嗰行嘅任何事，即係我做麥當勞，就唔會收工再食麥當勞。返工仲食唔夠？我唔排除自己多或少都出現依種消耗，無可否認教某啲內容嗰陣，我個心都有預設會點樣講，或者學生反應大概是點樣。於是近年我都無咩點講1914 年6 月28 號依個gag，或者有啲位覺得唔需要講得太仔細(完全係個自私嘅態度，因為同一條題目我講咗100 次，只限於我認識了100 次，對學生嚟講有機會係第一次、第二次、第三次)，依單嘢都可以話係教學盲點。假設咗學生能夠與我同步. . . 跟唔上就諗對方點解講極唔明。事實上，幾分鐘就明白咩係一果多因，點樣判別兩極化與比較題，並唔係一件容易嘅事。反過來講，想當年我都試過測驗判錯題落得5/15 下場，我又點樣要求學生一點就明？何況. . . 佢哋講吓明已經係好厲害，又邊需要補我呢？

我相信人都係希望有進步，我都不甘停留。有陣時原地踏步都係一種退步。趁考完2025DSE 我偷咗一個星期時間去旅行，旅程期間買咗本簿準備吓嚟緊上堂嘅嘢。我諗自己上咗無500 堂都有100 堂，仲有咩需要準備？依個又係無知嘅諗法。有陣時我知道自己講嘅例子未必係咁到位，亦都知道自己係個粗心大意嘅事，有啲細節、有啲轉折，係需要事前諗吓先. . . 過場夾硬定係好順，就真係差依幾分毫。或者無人會在意，可能學生都唔太在乎依啲「色水嘢」？諗返起好幾年前睇過一套戲，其中一句係「當一件事做到極致，咁就係藝術」。我唔敢講咩教學理念，講咩生命影響生命咁有份量嘅說話。只係用資本主義角度去睇，學生比得1,000 蚊學費，我就應該付出返值1,000 蚊嘅教學質素，應份的、需要的，稍為有些少職業操守應如此行。

唔知舊生睇到我寫依幾行有咩感受？係咪Chester 不再熱血、唔再講理想，份人變得現實？可能是，但我對學生嘅心係無變過。熱血嘅係我內心、青春嘅係你哋，起學校大計從來都唔會係一句口號、亦唔係一個空想。

單係我上第一堂額頭爆汗，手心多汗到滴水

我就知道. . . 我就知道

我還就是那個我