【歷史】蛻變?轉捩點?


Q: 蛻變同轉捩點答法有冇唔同架

A: 答你個問題前要搞清楚一樣嘢 - 咩係「蛻變」?乜嘢係「轉捩點」?【蛻變】原本形容蟬蛻殼變嘅過程,換言之,即係本質轉變(另亦稱為根本性轉變);【轉捩點】據台灣教育部字典就話係關鍵的轉變,依個解釋指你每時每刻都變緊,但係果啲唔叫轉捩點,而係一個好重要好重要嘅轉變先算數 - 例如你初戀啦(聽講一生一次,一次影響一生)、考DSE啦、返工啦,依啲先算係轉捩點,嘿嘿。

打完一堆都唔知講緊咩,講到尾,即係有冇分別啫?心水清嘅同學仔唔難發現 - 【轉捩點】好重視時間點,例如初戀、考DSE、入大學、18歲等,都有個劃分點一分為二成前同後,所以答起上嚟就有「前、中、後」三舊嘢,以下為例:

題目:初戀係咪你人生嘅轉捩點?

◇轉捩點前

所謂自己一個更開心,大時大節?唔係同屋企人過,就上網搵世界各地嘅朋友過。情人節?唔講你以為真係有朱古力食,心酸嘅嘢,無謂再多講。

◆轉捩點影響

直到一天你認識咗初戀,佢嘅出現改變你一生,過去你以為世界剩係得黑同白。因為多咗佢,將你由單細胞生物變成識少少為人著想。

◇轉捩點後

依家你做每件事都覺得好開心,生活唔再單調,放假?當然係約初戀出去食好西、放風箏、行街、Shopping、扮靚靚啦。世界不再一樣,人生都多返啲色彩。

講明先,為咗令你明乜係轉捩點,其實上邊個示範唔係做得咁好。Anyways,初戀示範帶出咗轉捩點題目係要交代「前、中、後」,討論到吓轉捩點點樣改造你(或者點樣無料到,假如你持不同意立場的話),最好做到點對點對比,亦都係依個原因所以初戀例子唔好。

至於【蛻變】好多時講緊一舊嘢點樣轉變,簡單咁講,就係由A變成B(基於解釋係話質變先算蛻變,所以A變A+唔算㗎)。情況就好似亞古獸時空進化成戰鬥暴龍獸咁,唔單止係由成長期變成究極獸咁簡單,根本兩隻嘢就唔同(無睇過數碼暴龍真係幫你唔到,經典都無睇過,返去煲哂0102先再讀歷史啦)。

換言之,單從【蛻變】同【轉捩點】依兩個詞語討論,明顯分別就係作答果陣前早係前後對比,後者係「中、前、後」再對比啦。當然,好多時都係問一樣嘢可唔可以帶嚟蛻變,咁就另一回事啦。