起學校大計壹(5)

夢想依個話題幾時講都唔會覺得遲。

適逢2025DSE 就快放榜，加上中五學生都快考完試，預備升中六。係時候要諗吓聯招揀咩大學讀咩科，再推遠啲就問埋將來想做邊行。始終有啲職業唔係你揸住張大學畢業證書就做得，好似律師、醫生、護士、會計等，都需要專業訓練先從事得。唔係話揀錯科入錯行就無彎轉，只係所付出嘅成本與代價隨住你嘅年紀增加就會變得更大。作為一個過來人，車老師其實可以分享嘅都唔多，始終今時唔同往日。想當年社會邊有依家咁開放，甚至係Ai 都未出現資訊唔算好流通，好多嘢都真係要去吓間學校、問吓師兄網友先知得清楚少少。依家？基本上餵到埋口，皇帝未急太監急到傻。

講起總係有啲學生唔知自己條路點行，咁係好正常嘅事。人生往後幾十年嘅事，點樣交比一個18 歲都未夠嘅細路去決定？加上一般中學生嘅生活體驗非常有限(可能依家唔同吧？但車老師第一次出國就已經係中六畢業旅行，講出嚟真係大鄉里未見過世面啦. . .)，簡單咁講中學課程無哲學、無政治學、無社會學，你又點樣知道大學政治與行政、哲學系、社會及工作系到底係讀咩呢？所以你無方向、無目標，前路極唔清晰係好正常亦都合理嘅事，千奇唔好太過擔憂。

與此同時，我鼓勵你從自己嘅歷史過去發掘。未接觸過就話未知啫，但經歷就清楚到底係咩一回事吧？

想當年車老師都係諗返自己有咩技能，有咩覺得好玩嘅嘢想將來繼續玩。於是我發現自己中文唔叻、英文都唔叻，科學更加唔使講，係對中史同歷史科有一定程度認識。跟住我考慮到自己對人感興趣，可能我係獨生仔好怕悶呢，對人嘅工作比起對住機械、電腦或文字更有溫度。換言之，即係我喺人文社科方面發展有著數(自己擅長)，而又要對有人嘅出現，咪即係做老師囉. . .

不過你見我一副遊戲人間嘅樣子，都唔係傳統嗰隻「陳老師」嘅模樣，我就再問自己一句想唔想入學校教？入學校做老師唔係唔好，甚至夠穩定、人工高、假期多，幾乎永遠同「青春」掛勾，咪話唔好。但後嚟我有幸返過幾個月日校教書，叫做過吓「梁老師」後就發覺依條路唔係幾適合自己。應該係我自負、係我霸道、係我相信自己唔應該困喺個籠牢裡面，唔想喺學校教書就剩返補習依條路. . . 於是好快入到大學Year one 就開始搵學生教補習(講係2015 年嘅事，真是long long time ago)，中間經過好多跌跌撞撞、走過高山低谷，遇見好多人，也做過好多事，變成你眼前依家上堂教書嘅我了，嘰嘰。

講咗咁耐都剩係介紹我點解要做補習，仲未講咩係「起學校大計」 . . . Opps，都係留返下次再講吧 :P