【考試】2018年資料題可以點出?


Q: Hello 我係18dse retaker 我知道今年(2018)dse dbq 分數上有變動 會有7/8/9/10分題

請問佢地既conclusion&comparison計唔計分?mark allocation for 7/8/9/10各自係點樣?感謝!

A: Hello,介紹吓2018年卷一嘅變動先 — 時間方面,由105分鐘增加至120分鐘;分數方面,由50分增加至60分。即係咩意思?整體咁講啦,你2018年4月21號(星期六考歷史人都開心啲)答果份卷每1分嘅題目比過去少6秒鐘時間作答。

6秒鐘係咩玩法?其實唔使理會,純粹係想搞吓笑,嘻嘻嘻嘻。

唔玩啦。見時間改動唔係同學仔關心嘅問題,唔喺到多講啦。相反,分數轉變確實值得大家諗吓,份卷由50分變咗做60分,果10分點安排好呢?喺依刻,希望大家試吓做考評局,代入身份,幫幫手諗吓點拆掂佢。

發問同學講到改變題目分數,即係有7分、8分、9分同10分嘅題目出現。唔錯,增加題目分數係個合理推斷。事實上,操開Pastpaper都知道考評局曾經出過7分、8分嘅題目。

⭐️2012PPQ3b│資料D能否充分反映1919-1938年間集體安全所受到的威脅?(8分)

⭐️2017DSEQ3c│第一次世界大戰有否使歐洲變得更好?試參考資料E及F,並就你對歐洲直至1929年的發展所知,解釋你的答案。(7分)

但係9分、10分呢?未見過,出嘅機會率亦都唔高。因為改變題目分數唔係一兩下就做到嘅事,將會產生更多問題 — 多咗果1分、2分點比?據考評局評分準則(Marking scheme)係L1、L2同L3,係咪要整個L4出嚟?咁,L4又應該點寫?

未解決、未解決。除非你哋做白老鼠啦,嘿嘿。

暫時擺低分數改變方案。仲有啲咩方法呀?嗱,其實可以增加題目嚟處理多咗果10分。唔係吹水,有跡可尋。DSE開波果陣歷史卷好鍾意問提問語,平均一份卷問3-4次(PP-2013),前世同佢有仇咁。但睇返近年,愈嚟愈少(2014-2017),去到2017剩係問咗態度,唔講以為歷史同提問語分咗手。

【陰謀論】唔難推斷考評局依個趨勢係為2018年鋪路。一方面,2018年歷史科考核修訂早喺2014年、2015年新學制中期檢討通過,時間會唔會巧合咗啲;另一方面,開首同大家開玩笑2018年份卷比之前啲卷少6秒鐘作答,6秒鐘嘅意義唔係時間長短,而係反映考評局背後嘅諗法 — 唔希望啲學生「大包圍Chok5**」。將啲題目拆得有咁散得咁散,你要大包圍?下邊仲有(c)、(d)問喎。

當然,上述只係個人猜測,孰真孰假,4月21號咪知囉。增加題目分數好,增加題目數量都好。同學仔你本身就係個5**嘅人,仲有嘢難到你咩?嘻嘻。記住四隻大字 — 見招拆招!

#Chehistory

#有問必答

#你問我答