【考試】點樣諗多啲論點?


Q: Essay 點樣可以諗多D point?

A: 點樣可以諗多啲論點或寫多啲字係唔少初讀歷史學生嘅疑問,好老實咁答你︰

「溫書啦!」

通常諗極都唔知點寫,或者寫極都無內容嘅因由都係源於無讀書。咁講唔係無理據,就算大家用緊唔同出版社嘅教科書,但你學一戰導火線講緊塞拉耶佛危機(1914),同樣其他學生學一戰導火線都係講緊塞拉耶佛危機。換言之,當大家準備考試嘅材料係一樣嘅情況下,點解有人可以寫到五六七版?點解有人剩係可以寫到兩段?答案呼之欲出,就係大家溫完書唔識用,此為本問題嘅核心。

 .

早前有個問題關於「WW1可以點溫」,入邊講到WW1要學嘅內容包括「列強關係」、「爆發原因」同「維和努力」。喺依到教大家多個技巧 — 拆題。

 .

其實都唔係啲咩技巧嚟,對課題有既定認識嘅情況下,收到條問題後第一步諗返關於課題邊一部分自然搵到論點︰

• 舉例2016DSEQ4︰「第一次世界大戰主要由歐洲列強的錯誤盤算所導致。」你是否同意此說?試參考資料G及H,並就你所知,解釋你的答案。

   o 依條題目問緊「爆發原因」,好自然聯想到民族主義、同盟制度、軍備競賽同殖民地爭奪等論點

• 舉例2012SPQ4︰追認並解釋20世紀法、德兩國關係的發展。

   o 依條題目就問緊「列強關係」,咁就要諗吓20世紀初德、法關係點、相關例子、原因等

依個技巧背後諗法係考評局唔會問啲課程綱要上無提及嘅內容,咁只要熟悉課文要點,收到題目配對返就自然諗到相關論點。講到依到唔少同學抱住個疑問︰「論述題變化多樣,唔係條條都問到咁直接喎。」無錯,歷史依科題型千變萬化,同樣嘅內容有N種問法。不過,請記住題目會變,史實係唔會變。發生咗就係歷史,暫時都未有多啦A夢同時光機比你穿越時空,既然係咁,見招拆招啦同學仔 ._______.

關於History有咩問題歡迎喺Q&A session問,識答一定答~