【考試】點樣整歷史筆記(2)?


Q: 我想問呢你寫 notes tips個到指個論點(第一本第二部分)係指啲咩🤔🤔🤔唔該曬吖你真係好有心😭😭😭

A: 同學仔你好,喺即食文化影響下千幾字嘅Post你都肯花時間睇哂佢再思考,實在太感動了~廢話唔多講,直接入正題。【筆記論點】係指答題目果陣主要用到嘅Points - 喺到做個示範︰

🙋🏻: 第二次世界大戰爆發原因有啲咩呀?

💁🏻‍♂️: 巴黎和會安排失當、經濟大衰退、極權主義等

🙋🏻: 咁巴黎和會對德國嘅安排係咩?

💁🏻‍♂️: 喺巴黎和會入邊制定咗《凡爾賽條約》,當中規定德國賠66億英鎊、承擔一切戰爭罪責、得返10萬人嘅軍隊等等

🙋🏻: 咁點解依個安排係失當呀?

💁🏻‍♂️: 因為條約太過嚴苛,德國人認為係喪權辱國之約,不單止做唔到防止戰爭,更加激起德國人嘅不滿,要求報復

🙋🏻: 咁又同二戰發生有啲咩關係呢?

💁🏻‍♂️: 德國人要求復仇嘅心促成希特拉上台(1933),納粹黨掌權德國之後就策劃一系列侵略,就好似吞併奧地利(1938)、侵略捷克(1939)咁,久而久之,最終就導致二戰啦

睇完上邊個示範,簡單咁講句,寫論點就係根據課程綱要(即係教育局要你學啲咩果份文件)而嚟。透過不斷地問自己點解、點解再點解,就自然將論點同結論連結埋一齊,可以完完整整咁寫返落答題簿啦~

關於寫論點有個溫馨提示 — 針對主題甲同主題乙兩個課題嘅獨特性,主題乙好似上邊個示範咁,寫返一戰嘅爆發原因、二戰爆發原因、冷戰爆發原因、冷戰結束原因、軍國主義興起嘅原因等等;但主題甲呢咁麻煩啲,要扣住「現代化」依個字去諗,所以問嘅問題就變成辛亥革命現唔現代化、香港政治現唔現代化、南京政府現唔現代化等,要注意返啦~

關於History問題,識答一定答,歡迎隨時喺Q&A session發問,盡快處理~