【考試】香港史點讀?


Q: 可唔可以講吓香港史點讀?覺得香港政制發展同現代化幾複雜,俾老師話concept混亂錯誤點算好?謝謝。

A: 依幾日都收唔少問題話自己唔明啲歷史概念,因而唔識溫、唔識答,結果愈讀愈頹甚至萌生放棄念頭。首先概念依個字空泛到不能再空泛,抽象程度唔係你同我估計得到。打個比喻,唔知個歷史發展可以話無概念、唔識作答技巧亦可以話無概念、 唔理解啲字眼(如現代化、威脅、局勢、偏見等)都係無概念。既然係咁,人哋話要學清啲概念或「Concept混亂錯誤」嘅時候,應該要問返對方到底講緊乜嘢。將大家由火星拉返落地球,喺互相理解嘅情況下處理概念問題,咁樣先至對症下藥,盡善又盡美。

題外話,上述過程叫批判性思考,係睇李天命講語理分析果陣學返嚟。終生受用,世間千千萬萬嘅問題(尤其係感情煩惱)都可以透過語理分析解決,嘿嘿。

至於香港史點讀依個問題就有得搞啦。根據教育局課程綱要(2015年11月版本)入邊講,香港史分咗兩個部分,分別【政治及行政轉變】同【國際城市發展】。

【政治及行政轉變】依部分講就話由二十世紀初學起,但實際上二十世紀初嘅香港政治咪要由1842年英國開埠講起,始終硬生生咁照單全收不過權宜之計,帶著問號去了解點解英國要整依樣整果樣先係路 — 點解要理華人精英?點解會有鄉議局?點解要三權分立?

知道二十世紀初香港政治模式嘅由來就好辦事,琴日教咗點樣做好一條追溯並解釋題(Trace and explain),同學仔可以做一次「追溯並解釋1900-1997年香港政治發展」。正,做完你就學識成個二十世紀香港政治及制度轉變同原因、有咩特色、趨勢、發展等,差唔多搞掂依部分。

【國際城市發展】依部分比較麻煩,因為佢再細分︰

A. 經濟社會發展

B. 文化承傳

C. 內地關係及亞太角色

先講A. 經濟社會發展,喺理解香港政治發展嘅背景下,其實經濟同社會發展都難唔到你,因為依兩個角度都受到政治所影響。要學好,同樣地建議做一次「追溯並解釋」,正。

B. 文化承傳,老實比較吹水,一般係搞清楚香港有咩中、外文化同本地文化,但唔少人忽略咗香港能夠孕育多元文化嘅原因,要留意吓啦~

C. 內地關係及亞太角色,有謂「香港自古以嚟就屬於中國嘅一部分」,原則上同學仔學完中國史先學香港史,咁就Nice啦。記住一句金科玉律︰當中國出事,香港就好市。以1950年至1960年代為例,中國發生多場群眾運動甚至大饑荒,香港呢?香港正值工業發展黃金時代,躍進成為亞洲四小龍之一。無水你架!

亞太角色指香港成為國際城市之後,即係二十世紀下半葉嘅事,分返政治、經濟、社會、外交等方面討論,歸納返啲角度同背後理據,搞掂。

生於斯長於斯。教親香港依個課題都好有親切感,的確啲問題有時係幾艱澀,但食住香港人身份依個優勢,一齊拆掂啲難關佢,Oushhhhhhh!

關於History有咩問題歡迎喺sayat.me/chehistory問,識答一定答~