【考試】經濟統合點讀?


Q: 可唔可以講下European integration個part點讀好難觸摸吖唔該你😭😭😭

A: 當然可以啦。

操緊Pastpaper嘅同學仔都知道今年出咗經濟統合,原則上翻炒嘅機會唔大,至於中四五呢?嘿嘿嘿嘿嘿,應該11月尾教到國際協作,學校考試測驗就走唔甩啦,嘻嘻。無論係2018DSE、2019DSE定2020DSE都好,經濟協作(或者話成個國際協作)建議剩係溫資料題就算,一方面係依個課題似學緊通識,你可以話一舉兩得何樂而不為?但就單獨歷史一科而言,國際協作(尤其係社會、文化合作)同本身學緊嘅課題關聯性唔大,直覺似學緊第二舊嘢,咁就難溫熟麻煩啦;另一方面,依個課題有唔少數據同組織名要記,除非你本身係個數據控,天生對數字好敏感。不然,明過放過佢是放過自己這個道理啦,好嗎?

講返重點,經濟協作主要分咗四個部分︰

1. 統合原因

2. 美、蘇扮演角色及背後考慮

3. 統合發展

4. 成就同局限

以資料題而言,【成就同局限】要花多啲心機去留意,特別係局限依部分比成就更為重要。依部分論點數目唔多,不過資料題唔一定要用論點入題,你用例子入題(舉例《申根公約》、歐羅、歐洲中央銀行、歐洲議會等)就可以寫多幾個論點,掂!

【美、蘇扮演角色】依部分多數人都知馬歇爾計劃(1948)、經濟歐洲合作組織(1948)、莫洛托夫計劃(1947)同經濟互助委員會(1949)。既然依啲係人所共知,要突圍而出就要諗吓計仔啦。

其實比較少人留意【統合發展】依點,因為早前考試已經出過追溯並解釋(嚴格上係出咗兩次,分別2012DSEQ5同2014DSEQ7),但唔理佢你就唔知歐洲經濟統合做緊咩,所以咪旨意棄咗佢。

雖然一開波講咗國際協作唔多討人喜愛。不過,踏入廿一世紀一超多強全球政治角力嘅局面,要知道過去點樣塑造今日嘅境況,國際協作課題提供咗唔少線索。另,都知Pastpapaer唔多相關練習,想操多啲,就要留意嚟緊嘅國際協作免費練習啦,呵呵~

關於History有任何嘢想做歡迎喺 Sayat.me/chehistory 提出,識答一定答。