【考試】目的題點樣答?


Q: Halo 想問下 purpose 嘅DBQ題目 點答呢?

A: 目的(Purpose)都算係資料題常見嘅提問語之一,出場率當然無看法(View)、態度(Attitude)咁高啦,但都不容忽視㗎。喺正式教點樣處理依隻提問字眼之前,不如先回顧吓歷屆試題(Pastpaper)幾時出過目的?等你想操都有個個指引嘛,嘻~

⭐️2014DSEQ2b丨根據資料E作者的看法,綏靖政策有什麼目的?試參考資料E,解釋你的答案(4分);

⭐️2012DSEQ3a丨推斷該海報的目的。試參考資料E,解釋你的答案(4分);

⭐️2012PPQ4b丨從資料F推斷赫魯曉夫發表這篇演說的目的。試參考資料F,解釋你的答案(4分);

⭐️2012SPQ1c丨根據資料D,推斷漫畫的目的。試解釋你的答案(3分);

⭐️2011CEQ1b丨孫中山作出資料B的演論,目的是什麼?參考資料B,解釋你的答案(4分)。

就咁睇,目的題嘅出法有兩個特徵: ・ 一、屬於基礎類提問語,簡單咁講,你見目的問親都係3-4分。早前講過資料題5分可以當係一個界線,5分或以下嘅題目作答要求會低啲,評分準則得L1同L2。反之,5分或以上嘅題目要求高啲,有L3嘅評分指引,或者最明顯就係要同時運用資料(Source)同個人所知(Own knowledge)作答。

既然係咁,答目的果陣主要都係睇有冇恰當運用線索,妥善解釋理據。Ok,大家都知依兩點知易行難,但起碼好過要用駁論、比較或者其他技巧處理先。

二、有內容,說來就真係有啲廢,無內容點樣答題目呢?Errrrrrrm,依到想講嘅與其係話「內容」,其實想指嘅包裝會更加準確。咩意思?即係目的唔會顯而易見,而係有些布遮住咗咁。好合理,諗返你細細個想買新衫或玩具果陣,除非呀媽真係好錫你,不然你都會用各種包裝去傳送依個意思 - 「呀媽,我最近成績進步咗呀!」、「媽咪,我件衫好舊啦。」哈哈哈,唔舉例子啦,你懂的。

既然係咁,初步對目的有印象之後就易處理啦,主要考慮3樣嘢 - 以2012PPQ4b為例

1. 內容

啱啱先講完目的嘅特徵係包裝,咁當然要知道個資料本身係講啲咩啦。喺2012PPQ4b入面,赫魯曉夫發表篇演說內容正關於和平共存啦。點樣知道?依點就關乎拆解資料,換言之,即係另一個問題啦。

2. 對象

嗱,同一件事你同A或B講係可以懷有唔同目的,打個比喻,考到5**你同屋企人講係希望佢哋以你為榮、同朋友講係分享喜悅。即係話,到底依家個「包裝」嘅對象係邊個都好緊要。返去2012PPQ4b,赫魯曉夫當時就係同莫斯科居民講,一個國家領導人同佢嘅國民講,會懷有咩目的呢?

3. 反應

反應指預期反應,即係你嘅對象知道「包裝」嘅消息後,佢最有可能係作出咩回應?依個回應其實就係目的。2012PPQ4b,作為莫斯科居民,聽到領導人係咁話和平共存正,別無他法㗎啦,當然係會支持啦。咁,咪搞掂囉,Yeaaaaah!

目的題話易唔易,出親都難到唔少考生,既然有成3年無出過,重溫一吓真係無壞呀~

歡迎利用Q&A session提出疑問,識答一定答,科科。

#Chehistory