【考試】特徵比較題點樣做?


Q: 想問下特徵比較題點做先好?

A: 惜逢2017年歷史科考評報告出咗版,同學可以從中得到參照。

特徵比較題,顧名思義,即係就住兩個唔同事物嘅特徵做比較。換言之,記得上次講過吓比較題係啲乜嚟嘅,咁依家A同B分別係「A嘅特徵」同「B嘅特徵」。之但係,乜嘢係特徵呢?記性再好啲嘅你,仲記得好耐好耐之前講過吓資料題提問語嘅話。特徵,即係特別之處。舉個例子,家燕媽媽有啲咩特徵?額頭有粒墨。梁振英有啲咩特徵?把聲好磁性(哎…都係聽返嚟,話說佢以前有個朵叫「大氣電波小王子」,信不信由你,反正我信了)。

若果將條題目設計成「比較家燕媽媽同梁振英嘅特徵」,好自然你會搵到A係家燕媽媽,B係梁振英,C呢?C會係啲咩?應該話C可以係啲咩?特徵。好,咁,即係特徵點樣比較?

講比較好多時關於衡量重要性。咩意思?即係比較iPhone X同iPhone SE邊部勁啲,五秒都可以慳返,當然係iPhone X啦!無錯,但點解?大部啲、威啲、核心多啲、快啲、影相好睇啲…諸如此類。iPhone X同iPhone SE嘅比較你係搵到結論,咁特徵呢?有冇方法證明到梁振英嘅特徵(把聲磁性)比家燕媽媽嘅特徵(額頭粒墨)更加正、更加勁、更加強、更加爽?

無。

咁特徵點樣比較,玩嘢咩?即係咁,特徵比較唔係衡量緊重要性,但可以係其他。其他?舉例特徵係比較緊差異。咩意思?即係梁振英把聲磁性,但家燕媽媽把聲點?家燕媽媽把聲夠厚(事實上家燕媽媽唱歌都唔差呀,起碼「唏呀唏呀唏」夠哂入屋)。咁可唔可以就住一個把聲夠磁性,另一個把聲夠厚嘅差異做比較?或者,家燕媽媽額頭有墨,不過梁振英望多兩眼真係好似隻狼咁奸。咁又可唔可以就住一個額頭有墨,另一個似狼嘅差異嚟做比較?

故事去返特徵比較題。舉返歷史題目「比較清末新政同南京政府改革嘅特徵」,咁大家識得做啦喎?唔係比較緊邊個威啲、勁啲、叻啲、現代化啲。相反,係比較緊兩者有啲咩差異。有冇例子?政治方面,晚清改革明顯以維持愛新覺羅皇朝為前題,南京政府則以共和體制為考慮。咁,就住兩者特徵上嘅差異,又可以做比較啦。

比較題喺中國課題會常見啲,有心喺公開試揀中國題目嘅同學要留意返啦。但切記「人比人,比死人」,你就係你本身嘅傳奇。做得比較題多果排好易將啲嘢不斷地比較,嘿嘿嘿嘿嘿嘿。

關於History有任何嘢想做歡迎喺Q&A session提出,識答一定答。