【考試】有冇溫習貼士?


Q: 有冇咩溫習tips😂😂😂

Q: 中六嘅學生可以點溫好呢科🙊

Q: 依加係中六,想請問如何操pastpaper(例如淨係做dse題目夠唔夠?操完可以點溫返等等)謝謝!

Q: 點樣可以俾啲練習你改😂🙇🙇

A: 所謂條條大路就通羅馬,拎5**亦都唔係得一個方法 — 有人抄筆記抄到5**;有人睇書睇到拎5**;有人天生就係5**。換言之,踏上5**大道嘅方法有好多種,揀啱一種適合自己嘅就係最好嘅方法。

先旨聲明,如有雷同,實屬巧合。以下介紹嘅方法適合啲對歷史科目標高、每日至少有兩粒鐘時間溫歷史、唔怕辛苦、有好多支原子筆、有好多張答題紙嘅同學。如果你符合哂上邊咁多項條件,恭喜你,你可以繼續睇落去啦。

答歷史科嘅題目你要運用到史實,換言之,你對成個歷史發展唔熟唔緊要,但係你連史實都無就係咁先。但係「點樣記史實」呀?依個問題同「呀媽同老婆跌落水你要救邊個先」一樣,每年都考起唔少初讀歷史嘅少男少女。背唔係唔好,但依個世界有過目不忘能力嘅又有幾多個?既然大家都係凡人,咁就唔該咁多位比啲誠意付出少少,唔好再以為望吓本書就可以收工啦。

打咗成段咁到底個方法係咩?做題目

做題目依個概念係有日返屋企嘅時候諗起,返屋企入大廈第一步就要㩒密碼,但明明無刻意記住個密碼點解又會記得?因為習慣。當你每日都要做果件事嘅時候,身體就會不由自主咁話比你聽應該點做,慢慢就成為生活嘅一部分(所以好危險,習慣咗舒適就唔識得挑戰)。

扣返題,當你做咗十條八條題目,寫親答案都要用例子嘅時候,你自自然然就會記得,舉例第一次世界大戰爆發,你會發現點都要用塞拉耶佛危機(1914);第二次世界大戰,好常用就係1939年突襲波蘭。久而久之,你仲發現「重點」,到底有咩例子係要記(事實上你做得題目多都唔使刻意去記),有咩例子係唔需要理會得個知就可以,一家便宜兩家著,一舉兩得你話幾好?

與此同時,當你做題目果陣,你就知道每個課題考評局鍾意點出題,佢出題個方式多數係點。依到唔係教你點樣貼題,而事實上我都唔識。所以唔好諗歪,係想指出你做題目果陣令你更加明白依個課題可以點樣溫,了解出題趨勢、出題方式,知彼知己,自然百戰百勝啦。

仲有仲有,做題目果陣唔單止係記例子,因為依家歷史科唔係背書大賽,你記到邊幾個例子,你記到幾咁熟悉仔細就可以拎5**。相反,史實只不過係基本,考試重點係點樣運用依堆人有你有嘅資料去作答題目,寫一個回應題目嘅答案。依點好多人稱為「答題技巧」,或者推深一層,就係思維分析同表達能力 — 而依兩點其實唔係ABC咁講出嚟記住就學識,而係腦震盪咁不斷諗不斷試不斷寫不斷傾,日子有功就練得一招半式啦(臨尾又係賣廣告時間,亦都係補習嘅精髓呀嘻嘻)。

所以再講落去已經係一舉唔知幾多得,作為過來人雖然面對嘅唔係2018DSE,但都叫試過不斷做題目。望住自己由幾分拎到十幾分,望住自己過去兩年做得幾份題目,到臨考前自己嘅「戰績」同「戰果」,果刻嘅成功感真係難以言喻,你懂的。

至於Pastpaper問題,唔使答你應該都心裡有數,當然係要做Pastpaper啦(不論中英文都好,你遇上資源問題都可以Dm/ inbox 睇吓大家可以點拆掂佢)。建議就由2006年CE開始做起直至永遠阿門,其實由中五升中六個暑假開始做就Very good,不過有心唔怕遲,亡羊都可以補牢,最緊要係你對依科有冇熱情啫。

做完交練習批改嘅方法係

1. PDF檔(順次序)

2. Email to chehistory@gmail.com

3. 耐心等待(傳說有禮貌、電郵有標題、上款同下款嘅練習處理得快啲)

關於依篇其實想問你哋轉頭,有咩可以幫到大家?天馬行空啲都唔緊要,有意思就會決定試吓嘻嘻,共勉!

🎉要Pastpaper或者改Pastpaper,可以Dm/inbox傾吓點解決;

🎉有History問題,可以用Q&A session問,識答一定答;

🎉其他問題(如有,應該都無),可以Email/ Whatsapp/ inbox/ Dm/ 用自己嘅方法查詢。

最後,感謝閱讀 :D!