【考試】幾個問題


Q: 你好,經常有疑問到底DBQ(c part題目)系需要寫得好似essay既每一段咁長定其實唔需要?系咪DBQ其實可以每段4/5句就可以?thanks

Q: 中學有冇揀中史科😭如何讀!!!

Q: 見到咁多人問問題我都想問下 其實DBQ7分題/9分題係咪斷point俾分,即2分一個pt,但係睇impression marking?

A: 【中史問題】確實就有讀過中史,但作為過氣考生同你哋依家準備考果份卷嘅內容已經好唔同啦(聽講依家有多項選擇題,咩料?)。想當年讀中史,甲部係不斷地背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背背,直到永遠阿門。總之甲部你有背就有機會拎分,無背就係咁先;至於乙部就多些少分析,同歷史一樣諗多啲點(提問點)同點(論點)之間嘅關係會好啲。選修就讀過婦女、宗教同制度,如果你個人鍾意讀必修乙部多過甲部,建議你讀婦女因為會好玩啲;相反,你鍾意甲部多過乙部的話,咁揀制度啱哂你。至於宗教,除非你係信徒對信仰充滿熱誠,唔係就算數啦。

老實講對中史無咩心得,當年都係靠考完Core果10日時間死衝爛衝就上路,結果當然係無5**啦。所以除非你覺得上邊堆字好有道理深受啟發,唔係嘅話建議你另謀高就,反正近年多咗私補中史,試吓係龍定蟲都好呀。

哎講多句,早前行書局見到當年搶到斷市嘅三色書出咗DSE版,想睇參考書依本唔錯(利申中六十一、二月先知有依本嘢,溫到隋唐就擺埋咗一邊,或者有人想要可以搵吓仲存唔存在)。

【DBQ問題】每個論點就兩分,一分係比線索(資料)、例子(個人所知);另外一分就係比解釋,即係你個線索或者例子同條題目有咩關係。當個答案有線索有解釋就會得分,哪怕你寫到水蛇春咁長定係得三四行都好,不變。好啦,即刻有人會問︰「點解睇到啲答卷寫得一段都有滿分或者多過兩分嘅?」

試卷封面考生須知第一點︰


本卷為歷史資料題,全部試題均須作答。每題佔分於題末括號內顯示,用以提示答案所需之篇幅;答案長度可為一小段或若干小段。

依到有兩個重點,一係關於時間運用但唔喺到講,二係關於論點長度 — 答案長度可為一小段或若干小段。好嘢,咁答一小段咪得囉,使唔使咁麻煩次次都寫隔行分段呀?兩個問題︰你寫完一段話果段有3個論點但閱卷員認為得1個,咁點算?當你3個論點分開寫,閱卷員有冇機會認為你得1個論點?

暫時未聽過改卷有Impression marking,但論點側重於個人所知或資料、用語論據集中其一或雙問題主要答一問等,相信都會拎唔足分,唔知算唔算Impression marking。

踏入十一月開始涼,小心身體,加油~

關於History問題,歡迎隨時喺 sayat.me/chehistory 提出,識答一定答!