【歷史】有冇歷史書介紹?


《你問我答丨有冇歷史書介紹》

好耐無收過「你問我答」嘅問題啦,差啲諗住摺咗佢㗎啦 😀

⚠賣廣告時間:想問問題記住用IG 簡介條Link 啊⚠

Q: 有冇D關於history 的好書推薦:-D

A: 歷史書呢……其實好多都好鬼悶,唔係做功課嘅話都唔會搵嚟睇。不過同學仔問到,當然有好嘢益你啦,嘻嘻~

話說今日二月出咗本書叫《人類大命運》(英文:Homo Deus: The Brief History of Tomorrow),但想介紹嘅唔係依本,而係佢嘅前身 - 《人類大歷史》(英文:Sapiens〔From Animals Into Gods〕)。依本書就正啦,正喺邊?

你有冇諗過人類唔係咩強大嘅生物 - 雀仔識飛,但我哋只可以喺上走;鯨魚唔係魚,但都可以深潛海底,不過我哋游多幾個池都嗌哂救命;當獅子老虎張牙舞爪嘅時候,我哋做緊咩? - 你睇,其實人類真係弱到無得再弱(情況就好似玩卡牌遊戲「狼人」入邊嘅村民,乜能力都無)。

咁,人類憑咩統治大半個世界,成為「萬物之靈」?

作者比咗好有趣嘅答案 -因為人類識講故仔。港味少少,即係人類「八卦」。事實主要分為三種 - 容觀、主觀同想像主體性。嘗試喺下邊解釋吓:

客觀事實:即係無論你信定唔信都好,依件事本身就係咁㗎啦。舉例水去到100度會滾。就算你唔相信都好,當你將水加溫到100度果陣,依然係會滾(突然醒起巴爾幹2011CE,一定係癲Q咗);

主觀事實:講明主觀,就係你相信,咁對你嚟講就係事實。舉例小明相信死後會上天堂,就算佛教徒同佢講會輪迴;物理論者話死咗之後係由Something變成Nothing都好,佢始終認為死咗之後去天堂先係事實,無得變(明顯對生死依個話題都有啲興趣嘻嘻);

***

上邊果兩個唔難明,但作者想講嘅係第三種:互為主體性現實

乜嘢嚟?互為主體現實係由好多好多人嘅互動、不斷交流同溝通而成嘅事實。簡單啲去理解,就係想像出嚟嘅現實。吓,咁樣仲會有人相信㗎咩?當然,包括你在內都深信不疑,比個例子你 - 錢。

錢係咩嚟?錢不過係張錢。記住有次上人類學嘅堂,個教授毫不猶豫咁拎咗張20蚊出嚟,然後再拎張紙出嚟,搞乜?撕爛佢(事後諗返撕銀紙好似犯法,所以佢果張應該假錢嚟,頂)。然後問:「有咩惑覺?本質上銀紙同A4紙都係紙,點解你會為咗張20蚊肉赤?」

無可否認客觀事實上20蚊紙只係張紙,醫唔到肚、天氣凍又比唔到溫暖你。不過,當依個世界幾十億人都相信「20蚊唔單止係一張紙咁簡單,而係軸有價值」嘅時候,成件事就變得不一樣啦 - 你可以拎佢去買M記醫肚、你可以拎佢去買暖蛋溫暖吓自己。就算七仔唔收依張20蚊,唔緊要呀,仲有OK、百佳、惠康、大大小小嘅藥房都會收。

因為錢係一個互為主體性嘅現實。

不過,假如有日依個世界大家都唔再相信「錢」依個神話嘅時候,M記?暖蛋?唔好玩啦。錢頓時失去咗佢嘅價值,就好似近排印度宣布500蚊同1000蚊紙作廢一樣,瞬間變廢紙,買唔到麵包、買唔到牛奶,勞動力都唔會再換取到錢一樣。

依個時候停一停,諗一諗,Apple?中國銀行?法律?正義?政府?中國?美國?幸福?生活上你接觸到嘅嘢九成都係互為主體性事實嚟。哇,Power power。

咁人類因為「八卦」所以建立咗堆「互為主體性事實」出嚟,同人類統治世界又有咩關係?統治世界之後下一步又會點?當依個世界疾病、戰爭同飢荒都大大下降嘅時候,將來會面對咩挑戰?

依啲都係《人類大歷史》同《人類大命運》將會處理嘅問題,有興趣嘅同學仔記住睇啦~其實依本書睇完都係似懂非懂,對中學生或者係本艱澀難明嘅書,但無理由介紹《動物農莊》(英文:Animal Farm)、《1984》坊間介紹過幾百次嘅經典㗎嘛(其實《人類大歷史》同《人類大命運》都好紅,嘻)~

或者睇唔明交流吓對大家都有益 😛

P.S. 其實有《人類大命運》同《人類大歷史》都有本,有興趣可以寄比你睇吓~