Q: Socialism with chinese characteristics到底係咩-.-？睇極都唔明
・
A: 到底乜嘢係「有中國特色的社會主義」呢？咁佢到底係咪「社會主義」？還是屬於「資本主義」呢？
・
〖有中國特色的社會主義〗唔係〖社會主義〗
讀過毛澤東時期嘅現代化努力都知道，所謂社會主義係由資本主義過渡至共產主義嘅一個進程。咁乜嘢係「資本主義」同「共產主義」呢？最易理解就係回顧返你依家嘅生活，香港好明顯係個資本主義社會 － 你擁有言論自由（社會方面）、選舉同被選舉權（政治方面）、亦都可以按自己心意購物儲蓄（經濟方面）。之但係，「共產主義」呢？顧名思義，共產共產共享財產，換言之，財富收歸國家（經濟方面）、社會講求穩定（社會方面）、最重要當然係一黨專政（政治方面）。
・
好籠統咁講，資本主義同共產主義最大嘅分別在於自由度。
・
既然係咁，身為毛澤東你會點樣落實共產主義？盡收天下民眾嘅自由，但你話無自由就無自由咩？自由摸唔到、食唔到、買唔到，玩嘢呀？所以要進入社會主義，就要取消個體化 － 基於就某意義嚟講自由就係個人主張，即係你鍾意食雞蛋仔可以選擇買嚟食、選舉你鍾意投7 號可以給個印仔比佢。亦因如此，喺毛澤東時期玩嘅就係集體化 － 互助組、合作社、人民公社、做又三十六唔做又三十六，依啲例子唔使多講大家都明白。記住重點係透過合作加強集體意識，從而去消除個人意志，上述就係早期毛澤東最想做到嘅事（嘿嘿嘿嘿，時至今日細心留意你會發現生活好多時都經歷緊同樣嘅事）。
・
搞清楚咩係「資本主義」、「共產主義」、「社會主義」後，咁乜嘢係「有中國特色的社會主義」？
・
實情係種好無賴嘅主張，咩意思？配合返祖國嘅國情，鄧小平改革開放之後一方面保持「社會主義」結構，但另一方面喺經濟方面引入「資本主義」市場經濟發展模式。換言之，好聽啲就係集國家之大成，但事實上就係不倫不類。
・
〖有中國特色的社會主義的特徵〗
・
於此看來，其實「有中國特色的社會主義」特徵唔難理解，政治上仍然奉行一黨專政、社會仍以保持穩定為重心、但經濟方面以市場經濟發展為手段。認知上大致無咩問題，不過觀察入徵嘅你唔難發現彼此間存有矛盾 － 經濟自由發展的同時，經濟法規卻由專制政府所制定；買賣自由的同時，社會刻意滅聲 － 有中國特色嘅社會主義就係咁特別。
・
嘿嘿嘿，國情嘅嘢，凡夫俗子豈能明白？
・
P.S. 有關歷史或者其他問題歡迎用IG 簡介嘅連結提出，識答一定答喔～
Comments