Q: 想問下你考dse個陣，做左幾多題DBQ 同essay呀？😂同埋當你想做額外既練習你會係邊到搵？當初點解會有念頭想搞free exercise既Wts group 同免費批改？
．
A: 前幾個問題向同學仔介紹過以操練作為溫習方法，嘻嘻，因為我就係咁樣走過嚟。換言之，當時做嘅練習數量都幾多。
．
DBQ嚟講，中五暑假叫輕易咁做過一次CE同DSE嘅題目。所謂輕易咁做，即係睇線索睇題目再寫返個論點出嚟就算，無完整作答。去到中六就逐個課題咁做，每題做過至少一次。然後？就沒有然後。所以望返份卷發現DBQ個分唔理想都唔係無原因，頂。
．
Essay就瘋狂啲，因為做Essay真係會做上癮。嘿嘿，一方面做兩條就粒半鐘，覺得自己溫咗好耐書（就係咁膚淺，吹咩）；另一方面久而久之就有疊戰利品（紙）拎喺手，人哋問你去圖書館做咗啲咩，拎幾題Essay出嚟哂冷咪話唔威（係好白痴，但真係好爽）。所以，當時平均每個課題做10條，加埋測驗考試Mock有啲題目重做再做 — 當然要重做！做得唔好難免灰心。但灰心完唔好擺埋一邊，當佢係仇人咁啤住個分，甚至重做做到好為止。以不完美追求完美嘅執著對拎5**嘅人嚟講係非常重要！
．
所以，粗略估計考試前做咗70-90條論述題啦。
．
至於題目邊到嚟？基於當時有補習，自然就喺補習呀蛇果到嚟。題外話，同大家分享吓補習嘅價值，唔知大家對歷史補習有啲咩期望。喺到唔詳講，剩係講一點。一科學費閒閒地都500-600蚊個月，因為歷史係私補所以貴啲，900蚊個月。對個零收入嘅中學生嚟講係難負擔架，不過值得。點樣說服自己值得？就係不斷地做練習。你每個月準時上堂要比900蚊學費，但你上堂之外交多幾份練習又係900蚊學費。之但係，對個補習呀蛇嚟講就另一回事，佢除咗要花時間喺堂課外，仲要抽其他時間批改，有時唔識要問解唔明仲要額外補課，咁仲值唔值？
．
所以當時補習呀蛇真係好好好好好好好好好好好好好好好好好好好好好好好好好好好好好好好好好好好好好好好好，正確嚟講，係世界級嘅好。
．
喺今日講補習就好似問你放晏食咩一樣咁閒。但好奇怪，對於食咩、喺到邊到食、好唔好味等問題甚少人理會，或者交比Openrice、Foodie就算。點先係個精明而又負責任嘅食家，依個問題值得諗吓。
．
答到依到，睇嚟你都明點解會整免費練習、討論小組同免費批改啦。有人話宣傳補習、有人話搏關注、仲有千百萬種講法…嗯。兩方面啦，一方面補習呀蛇咁好，無理由自己爽完就算架嘛，啱唔啱聽先？咪仿傚佢做啲傻事囉；另一方面，雖然唔想做日校老師，但確實想行教育依條路。
．
老土咁學半澤直樹講句︰「要珍惜人與人之間嘅關係，唔要活到成個機械人咁。」
．
P.S. 曾經有同學仔問使唔使做埋AL嘅題目，有時間實好架，反正知識多咗唔會係件壞事。但時間不足要兼顧其他科的話，剩係做CE同DSE嘅題目都好足夠。哎，當然仲可以做埋每星期出嘅Free exercise啦，嘿嘿嘿，自問高質架。
．
關於History有任何嘢想做歡迎喺 Q&A session提出，識答一定答。
Comments