【人生】讀歷史嘅影響


It’s all about love

依家啲中學生真係有趣,上星期日答完個「幾時開始鍾意歷史」嘅問題後,竟然有同學仔話期待第二集。傻嘅,邊到嚟咁多第二集?本身唔係啲咩有影響力嘅人,亦都唔太習慣講自己嘅事出嚟。講咗,有冇人想知先?但見最近啲思春期少年少女就聯招(Jupas)揀科問題摸不著頭腦,決定借大家幾分鐘時間講個故仔。

前途問題 — 讀香港課題會學到,同學仔中六畢業會面對。咁,何況大學生呢?四年一夢,到二零一八年春天無意外嘅話就著起畢業袍告別校園啦。大限將至,接下嚟到底擔任咩角色?朋友們都為咗答依個問題變成熱鍋上嘅螞蟻、想屙屎但又屙唔出咁,到底點算好?

Google吓「歷史系出路」,原來早喺2012年已經有人喺高登討論過,離不開公務員、博物館、老師同其他非專科學士學位工作。讀歷史係慘過食屎?三年幾喺大學讀歷史又學到啲咩?

唔係想同大家討論歷史嘅意義,反而想講吓讀歷史嘅影響 — 一方面對自己了解更多。每個人剩係可以活一次依點無人反對啦掛?但到底點樣先叫活得好,或者活得幸福呢?相信100個人就有100個唔同嘅答案,透過學習前人如何活、如何形塑今天社會嘅一花一草一張八達通一罐可樂等,好快就會搵到自己想過嘅生活、想成為嘅人;另一方面更加認識依個世界。好似答資料題咁,同一個線索你有N個詮釋嘅方法。舉個例子,女人著得少布,喺東方社會就指你係PTGF、援交等;但喺西方社會則認為你係開放、熱情。同一件事有N個理解,到底邊個你較為認同?通識咪會問價值觀嘅,睇嚟都離不開歷史。

喺依個人吃人嘅社會,到底講歷史嘅影響、人生嘅意義係咪太過烏托邦?今年剩係收咗10個學生,若然剩係教佢哋答題技巧、歷史發展而唔思考。咁,我會接受唔到自己。

這,就是專科歷史教會我的事。

相關資料(Reference)︰

高登,【認真】讀歷史既人有乜出路︰https://forum.hkgolden.com/view.aspx?type=CA&message=3673238&highlight_id=0&page=1&authorOnly=False

#Chehistory